ئیحسان عەبدولجەبار، وەزیری نەوتی عێراق رایگەیاند، بۆ یەكەم جار لە مێژوودا عێراق نەوتەكەی بە نرخێكی زیاتر لە نرخی نەوتی برێنت هەناردەی بازاڕەكانی وزە كرد.
وەزیری نەوتی عێراق گوتیشی: وڵاتەكەی بۆ ماوەی دوو مانگە لەسەر یەك نەوتەكەی بە نرخێكی گرانتر لە نەوتی برێنت هەناردەی بازاڕەكان دەكات.
ئەمە لە كاتێكدایە، نەوتی خاوی برێنت بووەتە پێوەر بۆ نرخی دوو لەسەر سێی بەرهەمی نەوتی جیهانی، كە لە 15 كێڵگەی جیاوازی ناوچەی برێنت و تینیان بەرهەم دەهێنرێت "بەشێكیان لە بەریتانیایە و بەشێكی دیكەش دەكەوێتە وڵاتی نۆرویژ" و نزیكەی 500 هەزار بەرمیل نەوتی رۆژانە بەرهەم دەهێنن،
هەمیشە نەوتی برێنت بە نرخێكی گرانتر لە نەوتی ئۆپیك لە بازاڕەكانی جیهان مامەڵەی پێوە كراوە، دوای دابەزینی نرخی نەوت لە بازاڕەكانی جیهان، عێراق بە بەراورد بە ساڵانی رابردوو داهاتی ساڵانەی بە گوژمەی 11 ملیار دۆلار لەدەستداوە.
ئامادەکرن:یاسـر کەشـانـی